LV RU EN

Sestdiena, 2022. gada 28. maijs
Vilhelms, Vilis
Ludza
Cloudy
8°C
 
A A A

Byus vareiba tīšsaistē bez moksys vuiceitīs latgalīšu rokstu volūdu

Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus.

Latgalīšu rokstu volūdys nūdarbeibys vadeis vīna nu zynūšuokūs latgalīšu rokstu volūdys specialistu, latgaliskūs gruomotu korektore, pīredzējuse volūdys nūdarbeibu vadeituoja i volūdys eksperte Māra Mortuzāne-Muravska. 

Volūdys nūdarbeibys byus divejūs periodūs – pavasara i rudiņa. Pavasara periodā latgalīšu rokstu volūdys vuiceišonuos paradzāta kotru ūtrū ūtardīni, suocūt nu 26. apreļa 19.00 stuņžu. Nūdarbeibys planavuotys ari 10. majā, 24. majā i 7. junī, bet rudiņa periodā 6. septembrī, 20. septembrī, 4. oktobrī i 18. oktobrī.

Latgalīšu rokstu volūdys nūdarbeibuos varēs pīsadaleit Facebook tīšraidē bīdreibys “LgSC” profilā, kai ari viertīs latgalīšu kulturys ziņu portalā lakuga.lv i bīdreibys “LgSC” sātyslopā lgsc.lv. Nūdarbeibys ir bezmoksys, tymuos var pīsadaleit bez latgalīšu rokstu volūdys prīškzynuošonu i tū, kai pareizi raksteit, kai latgalīšu rokstu volūda atsaškir nu latvīšu literaruos volūdys varēs īsavuiceit nūdarbeibu laikā. Kab pīsadaleitu nūdarbeibuos, īprīškeja dasasaceišona nav vajadzeiga.

Bīdreibys “LgSC” planavuotūs nūdarbeibu mierkis ir veicynuot sabīdreibys izpratni par latgalīšu rokstu volūdu i izgleituot par latgalīšu rokstu volūdys pamatprincipim, kas juojem vārā, kab pīraksteitais latgaliski atbylstu 2007. godā pījimtajim Vaļsts volūdys centra “Latgalīšu raksteibys nūsacejumim” (vaira informacejis ITE). Tai kai latgalīšu rokstu volūda školu vyspuoreigajuos programuos kai sistematiskys vuiceibu prīškmats nateik vuiceits jau gondreiž symta godu, kūpejais rokstu volūdys zynuošonu leimiņs i izpratne par tū Latvejis sabīdreibā ir cīši zams. Atguodynuojumam: latgalīšu rokstu volūda atbylstūši Vaļsts volūdys lykuma 3. panta 4. daļai teik defināta kai viesturiskys latvīšu volūdys paveids i vaļsts paradz tuos saglobuošonu, aizsardzeibu i atteisteibu.

Kab saprastu sovu latgalīšu rokstu volūdys zynuošonu leimini, var aizpiļdeit volūdys testu ITE.

Bīdreiba “LgSC” jau vaira nakai 15 godu aktivi rauga izgleituot sabīdreibu par latgalīšu rokstu volūdu, pīgrīst viereibys tuos pastuoviešonai i atteisteišonai. Bīdreiba uztur vīneigū kasdīnā latgaliski rokstūšū medeju – latgalīšu kulturys ziņu portalu lakuga.lv, reikoj volūdys kursus i seminarus, izdūd literara i izzynūša satura materialus latgaliski i eistynoj cytys aktivitatis latgalīšu rokstu volūdys byušonai ari iz prīšku.

Kursu nūtikšonu finansiali pabolsta Sabīdreibys integrafejis fonds nu Kulturys ministrejis daškiertūs Latvejis vaļsts budžeta leidzekļu.

Informāceju sagatavuoja:
Edeite Husare
Bīdeiba “LgSC” | Latgalīšu kulturys ziņu portals lakuga.lv
[email protected]
http://lgsc.lv

coloring.cool